Policia ka vënë në pranga dy të rinj nga Tirana, pas një ndjekje me makinë si nëpër filma. Sipas uniformave blu, dy të rinjtë G. S., 25 vjeç, banues në Dibër dhe A. T., 20 vjeç banues në Tiranë, i morën me dhunë rreth 4 milionë lekë dhe automjetin një 62-vjeçari në Peshkopi.
Ata kishin zbritur nga makina dhe i kishin marrë me dhunë paratë shtetasit me inicialet M. Gj., duke i shkaktuar dëmtime në trup, dhe më pas ishin larguar me shpejtësi me automjet.
Pas disa orësh ndjekjeje, policia i arrestoi ata në aksin rrugor Peshkopi-Bulqizë. Në makinë atyre iu gjet edhe shuma që i morën me dhunë 62-vjeçarit.
Njoftimi i policisë:
I morën me dhunë një shumë parash, një shtetasi, falë reagimit në kohë, veprimeve hetimore të shpejta dhe profesionale, si dhe ndjekjes së pandërprerë, në kuadër të operaconit “Vapori”, Policia kap dhe arreston brenda pak orësh 2 autorët e dyshuar.
Sekuestrohet shuma e parave 364.000 lekë të rinj, që i morën me dhunë 62-vjeçarit, si dhe automjeti me të cilin u larguan autorët e dyshuar.
Pas marrjes së njoftimit se në sheshin “Vapori”, në qytetin e Peshkopisë, dy shtetas të paidentifikuar kishin zbritur nga makina dhe i kishin marrë me dhunë një shumë parash shtetasit M. Gj., 62 vjeç, duke i shkaktuar dëmtime në trup, dhe më pas ishin larguar me shpejtësi me automjet, shërbimet e Drejtorisë Vendore të Policisë Dibër dhe ata të Komisariateve të Policisë Dibër dhe Bulqizë, janë vënë menjëherë në ndjekje të autorëve të dyshuar.
Si rezultat i reagimit në kohë, punës së mirorganizuar dhe bashkëpunimit të strukturave të Policisë, u bë i mundur identifikimi i 2 autorëve të dyshuar dhe lokalizimi i automjetit me të cilin ata po qarkullonin.
Në kuadër të operacionit policor “Vapori”, shërbimet e Policisë bënë të mundur që pas disa orësh ndjekjeje, të kapnin, në aksin rrugor Peshkopi-Bulqizë, 2 autorët e dyshuar, të cilët udhëtonin me një mjet tip “Fiat”, në të cilin, gjatë kontrollit, Policia gjeti dhe sekuestroi edhe shumën e parave (364.000 lekë të rinj), që i morën me dhunë shtetasit M. Gj.
Në përfundim të veprimeve të para hetimore është bërë arrestimi në flagrancë i autorëve të dyshuar:
G.S., 25 vjeç, banues në Dibër dhe A. T., 20 vjeç, banues në Tiranë, për veprën penale “Vjedhja me dhunë”, kryer në bashkëpunim.
Materialet procedurale iu referuan Prokurorisë, për veprime të mëtejshme.
