Qindra refugjatë ukrainas të cilët janë strehuar aktualisht nga familjet holandeze po përballen me dëbim gjatë pushimeve verore, të paktën sipas medieve lokale.
Familjet që u ofrojnë refugjatëve strehim nuk duan të shkojnë me pushime duke i lënë mysafirët vetëm në shtëpitë e tyre pa mbikëqyrje, raportoi të dielën agjencia e lajmeve ANP. Agjencia tha se komunat në të gjithë Holandën po përgatiten për një fluks refugjatësh ukrainas që aktualisht qëndrojnë në rezidenca private.
“Macja shkon te shtëpia e miqve dhe ukrainasit në strehë. Po, ky është realiteti i ashpër.”- shpjegoi një person i intervistuar për raportin. Qindra refugjatë nga Ukraina u strehuan nëpër familjet holandeze në pranverë, kur miliona nxituan në Evropë pasi Rusia filloi operacionin e saj ushtarak në vendin e tyre. Tani “periudha e muajit të mjaltit ka mbaruar” dhe shumë mikpritës nuk i duan më mysafirët e tyre, thuhet në raport, citon RT.
“Njerëzit thonë: Unë jam duke shkuar me pushime dhe nuk dua që ukrainasit të jenë vetëm në shtëpinë time. Ndonjëherë ukrainasit thjesht i lëshojnë në strehë.“- u citua të thoshte një zëdhënës i rajonit të sigurisë Brabant-Zuidoost – një organ publik i ngarkuar me koordinimin ndërrajonal të reagimit emergjent në Holandë.
Situata është pothuajse e njëjtë në pjesë të tjera të Holandës, thuhet në raport. Komunat po përgatisin hapësira shtesë strehimi për ukrainasit, duke shpresuar të kufizojnë nevojën për të rivendosur refugjatët gjetkë në vend.
Refugjatët ukrainas u mirëpritën në shumë pjesë të Evropës, por një numër vendesh pritëse që atëherë ose i kanë shkurtuar ose anuluar përfitimet dhe subvencionet që kishin ofruar në fillim. Ardhja e verës ka rezultuar me dëbime në vendet bregdetare si Bullgaria, ku hotelet që përdoreshin si strehimore të përkohshme duhej të liheshin gjatë verës për turistët.
