Vendosni fjalën kyçe....

Lana doli nga shtrati, OSSH kufizon furnizimin me energji elektrike në disa zona


Për shkak të shirave që përfshinë kryeqytetin ditën e sotme, Lumi Lana ka dalë nga shtrati duke sjellë probleme jo vetëm me qarkullimin rrugor, por edhe me energjinë elektrike.

Si pasojë e motit të keq, operatori i sistemit të shpërndarjes ka stakuar tre fidera me kërkesë të policisë si masë sigurie.

OSSH bën me dije se është kufizuar furnizimi me energji elektrike në zonat “Bulevardi “Bajram Curri”, “Zhan Dark”, rruga e Kavajës, rruga “Myslym Shyri” etj.

Njoftimi i OSSH-së

Me kërkesë të Policisë (salla operative), për shkak të daljes së lumit Lana nga shtrati, OSSH stakoi 3 fidera të NS Selitë, si masë sigurie.

Këto linja furnizojnë pjesërisht zonat “Bulevardi “Bajram Curri”, “Zhan Dark”, rruga e Kavajës, rruga “Myslym Shyri” etj.

Pas verifikimeve në terren për prani të ujit në kabina, ekipet e OSSH rikthyen pas 25 minutave energjinë elektrike për 2 fiderat.

Aktualisht po i japim gradualisht energji zonave të prekura nga masa e sigurisë deri në rikthimin e plotë të energjisë në të gjitha zonat.