Çmimi i naftës mund të rritet nëse Bashkimi Evropian ndalon papritur importin e naftës ruse nga tregjet e tij të energjisë, tha JPMorgan të martën në një shënim të parë nga Business Insider.
Sipas bankës së investimeve, një embargo e plotë dhe e menjëhershme do të zhvendoste katër milionë fuçi naftë ruse në ditë, duke e çuar vlerën e naftës së papërpunuar Brent në 185 dollarë për fuçi.
Një ndalim i tillë nuk do të linte ‘as hapësirë dhe as kohë për të ridrejtuar furnizimet në Kinë, Indi ose blerës të tjerë të mundshëm zëvendësues’, tha JPMorgan.
“Në një largim më të ngadalshëm, Rusia do të kishte më shumë kohë për të rregulluar rrjedhat e saj të naftës drejt blerësve më miqësorë dhe rritja globale e ofertës së ish-OPEC+ do të kishte kohë të rritet mjaftueshëm për të mbushur të paktën një pjesë të vrimës së madhësisë së Rusisë në furnizimin global të naftës.” – shtoi banka.
Paralajmërimi i bankës ‘Wall Street’ vjen pasi BE-ja konsideron një embargo ndaj importeve të naftës ruse. Nëse ndalimi i BE-së do të vihej në fuqi për një periudhë katër mujore, çmimet nuk do të kishin gjasa të rriteshin shumë më lart se nivelet e tanishme, tha banka. Nafta e papërpunuar Brent u tregtua të mërkurën, me 108.25 dollarë për fuçi.
Ndërkohë, të dhënat tregojnë se India ka rritur importet e saj të naftës ruse në trefishin e niveleve të regjistruara në vitin 2021. Sipas ‘Economic Times’, rafineritë shtetërore të naftës në vend planifikojnë të rrisin importet ruse.
Kina gjithashtu ka rritur blerjet pasi shitësit rusë të naftës së papërpunuar u kishin ofruar blerësve kinezë fleksibilitetin për të paguar në juan. Ngarkesat e para të blera me monedhën kineze do t’u dorëzohen rafinerive të pavarura në maj, shkruan Bloomberg.
