Hungaria tha të mërkurën (6 prill) se ishte e përgatitur të paguante rubla për gazin rus, duke thyer qëndrimin e Bashkimit Evropian, i cili ka kërkuar një front të bashkuar në kundërshtimin e kërkesës së Moskës për pagesën në rubla.
Hungaria do të paguajë për dërgesat në rubla nëse Rusia e kërkon këtë, tha kryeministri Viktor Orban në një konferencë shtypi të mërkurën.
Presidenti rus Vladimir Putin ka paralajmëruar Evropën se rrezikon të ndërpresë furnizimin me gaz nëse nuk paguan në rubla, raporton REL.
Ministri i Jashtëm i Hungarisë Peter Szijjarto tha më herët se autoritetet e BE-së nuk kishin “ndonjë rol” për të luajtur në marrëveshjen e furnizimit me gaz me Rusinë, e cila bazohej në një kontratë dypalëshe midis njësive shtetërore hungareze dhe Gazprom.
Hungaria ka qenë një nga disa shtete anëtare të BE-së që ka refuzuar sanksionet energjetike kundër Moskës në përgjigje të pushtimit, të cilin Rusia e quan një “operacion special ushtarak”.
Orban, qeveria e të cilit ka ndjekur marrëdhënie të ngushta biznesi me Moskën për më shumë se një dekadë, erdhi në pushtet për një mandat të katërt radhazi në zgjedhjet e së dielës, pjesërisht me një zotim për të ruajtur sigurinë e furnizimit me gaz për familjet hungareze.
