Rusia ka vendosur të largojë një pjesë të personelit të saj diplomatik nga Ukraina.
Moska thotë se i frikësohet provokimeve të mundshme. Masa erdhi pasi SHBA, Britania dhe disa vende të tjera filluan të evakuojnë disa punonjës dhe familjarët e tyre nga ambasadat në Kiev muajin e kaluar, tha Moska të shtunën, duke argumentuar se shtetet perëndimore mund të kenë disa njohuri që nuk janë ndarë me Rusinë.
“Ne po nxjerrim përfundimin se kolegët amerikanë dhe britanikë ndoshta janë të vetëdijshëm për disa veprime të dhunshme të përgatitura në Ukrainë që mund të dëmtojnë seriozisht sigurinë”, shkroi në mediat sociale zëdhënësja e Ministrisë së Jashtme ruse, Maria Zakharova.
“Duke pasur frikë nga provokimet e mundshme nga Kievi apo vendet e treta, ne me të vërtetë kemi marrë një vendim për njëfarë optimizimi të stafit në misionet tona në Ukrainë.”
SHBA urdhëroi evakuimin e personelit jothelbësor nga ambasada e saj në Kiev të shtunën dhe këshilloi amerikanët të mos udhëtonin drejt Ukrainës.
Izraeli të premten lëshoi gjithashtu një paralajmërim udhëtimi për Ukrainën dhe njoftoi evakuimin e punonjësve të ambasadës dhe familjeve të tyre.
Zyra e Jashtme e Mbretërisë së Bashkuar, e cila filloi të tërheqë diplomatët dhe familjet e tyre në janar, këshilloi britanikët të premten që ‘të largohen nga Ukraina tani teksa fluturimet tregtare janë ende në dispozicion’.
