Vendosni fjalën kyçe....

NASA po kërkon përgjigje mbi jetën dhe ekzistencën tek studiuesit fetarë


NASA ka kërkuar ndihmën e teologëve për të shqyrtuar se si do të reagonte bota nëse jeta do të gjendej në planetë të tjerë dhe çfarë ndikimesh do të kishte një zbulim i tillë në besimet e thella rreth hyjnisë dhe krijimit.

Agjencia amerikane e hapësirës ka rekrutuar rreth 24 studiues deri më tani për të marrë pjesë në një program në Qendrën e Kërkimit Teologjik të Universitetit Princeton (CTI) në Nju Xhersi, e cila mori një grant prej 1.1 milionë dollarësh të NASA-s në vitin 2014, synon të ndërtojë ‘ura mirëkuptimi’ midis akademikëve të disiplinave të ndryshme, shkencëtarëve dhe politikëbërësve mbi ‘shqetësimet globale’.

Sipas Daily Mail, programi me sa duket synon t’u përgjigjet pyetjeve të tilla të mëdha si ‘çfarë është jeta? Çfarë do të thotë të jesh gjallë? Ku e vendosim kufirin midis njeriut dhe të huajit? Cilat janë mundësitë për jetën e ndjeshme në planete të tjera?’

“Ne mund të mos zbulojmë jetën për 100 vjet. Ose mund ta zbulojmë javën e ardhshme”, tha një ekspert i NASA-s për gazetën, e cila shtoi se departamenti në rritje i ‘astrobiologjisë’ i agjencisë ka kërkuar përgjigje të reja për pyetjet e vjetra për rreth 25 vjet.

Për shkak të kësaj, feja veçohet si pjesë e synimit të vazhdueshëm të NASA-s për të mbështetur punën mbi ‘ndërlikimet shoqërore të astrobiologjisë’, duke punuar me organizata të ndryshme partnere.

Figura të tjera fetare, duke përfshirë Peshkopin e Buckingham Alan Ëilson, Rabinin Jonathan Romain i Sinagogës Maidenhead dhe Imamin Qari Asim i Xhamisë së Mekës në Leeds, i thanë The Times se mësimet e krishtera, çifute dhe islame nuk do të prekeshin nga zbulimi i jetës së huaj.