Tre punonjës të Ujësjellësit e Shëndetit Publik në Krujë janë pezulluar lidhur me helmimin nga uji të më shumë se 600 banorëve të qytetit.
Ata akuzohen për shpërdorim detyre për sa i përket ndotjes së ujit të pijshëm.
Zyrtarët e pezulluar janë Ledio Çela, administrator i Ujësjellës Kanalizimeve, Andi Zhupa, drejtues teknik i Ujësjellës Kanalizimeve e Ervin Karafili, shefi i Epidemiologjisë e Higjienës.
Pak javë më parë, më shumë se 600 banorë të Krujës u shtruan në spital ose morën ndihmë mjekësore me simptoma helmimi. Pas analizave të kryera rezultoi se shkak i helmimit ishte uji i ndotur.
