Sipërmarrja e re e mediave sociale e ish-presidentit Donald Trump thotë se ka mbledhur 1 miliard dollarë nga investitorët.
“Trump Media & Technology Group” po punon për të lançuar një aplikacion të mediave sociale të quajtur Truth Social në fillim të vitit të ardhshëm.
Kjo nismë erdhi pasi Trump mbetet ende i ndaluar nga Twitter dhe Facebook pas sulmit në Kapitolin e SHBA-ve në janar.
“1 miliard dollarë i dërgon një mesazh të rëndësishëm Big Tech se censura dhe diskriminimi politik duhet të marrin fund.”– tha Trump, citon BBC.
Ai shtoi se me zgjerimin e bilancit, synon të luftojë kundër “tiranisë” së kompanive të mëdha të teknologjisë.
Trump i njoftoi planet për të nisur Truth Social në fillim të këtij viti, duke thënë se kjo do të lejonte bisedën “pa diskriminim në bazë të ideologjisë politike”.
Sipas raporteve, sipërmarrja e mediave sociale tani vlerësohet në pothuajse 4 miliardë dollarë.
