Vendosni fjalën kyçe....

Rusia i kërkon personelit të ambasadës amerikane të largohet nga Moska brenda 31 janarit 2022


Punonjësve të ambasadës amerikane, të cilët kanë qenë të stacionuar në Moskë për më shumë se tre vjet, u janë dhënë disa javë për t’u larguar nga vendi, ka njoftuar Ministria e Jashtme e Rusisë, mes një mosmarrëveshjeje në rritje me Uashingtonin rreth vizave diplomatike.

Duke folur në një konferencë të mërkurën, zëdhënësja diplomatike Maria Zakharova njoftoi se ‘deri më 31 janar 2022, punonjësit e ambasadës amerikane në Moskë, të cilët kanë qenë në detyrë për më shumë se tre vjet, duhet të largohen nga Rusia’.

Lajmi vjen pasi Uashingtoni thuhet se mohoi zgjatjen e vizave të dhjetëra anëtarëve të familjeve të diplomatëve rusë me bazë në SHBA. Sipas Zakharova, ‘ne e konsiderojmë veprimin amerikan si një dëbim të qartë dhe synojmë të reagojmë në përputhje me rrethanat’.

Ajo tha se ‘një lojë e tillë’ nisi me vendimet e politikës së Amerikës, dhe jo sepse Rusia ishte e etur për të ndërprerë lidhjet.

“Ne u përpoqëm gjatë dhe shumë të arsyetonim me ta dhe t’i drejtonim në një zgjidhje konstruktive të çështjes, por ata bënë zgjedhjen e tyre.”

Në fillim të kësaj jave, zëvendësministri i Jashtëm Sergej Ryabkov tha se Moska do të hakmerret për ngërçin. Të dy shtetet janë përfshirë në një grindje të gjatë për numrin e diplomatëve që mund të vendosen në të dy vendet.

Presidenti i SHBA Joe Biden zbuloi muajin e kaluar se numri i personelit amerikan në Rusi ishte zvogëluar në 120 nga 1200 në fillim të 2017-ës dhe tha se ishte e vështirë të vazhdohej operacioni atje kur kufizohej vetëm në një ‘prani kujdestare’.

Uashingtoni ka urdhëruar gjithashtu mbylljen e konsullatave të tij në të gjithë Rusinë.Në fillim të këtij viti, duke përmendur kufizimet në punësimin e stafit lokal, Ambasada e SHBA në Moskë ndaloi përpunimin e vizave jodiplomatike.

Presidenti rus Vladimir Putin u takua me Biden në qershor për samitin e tyre të parë dypalësh që kur lideri amerikan mori detyrën dhe më vonë diskutoi për normalizimin e shërbimeve të ambasadës. Ministri i Jashtëm i Moskës, Sergey Lavrov, megjithatë, tha se bisedimet rezultuan të pafrytshme për shkak të përpjekjeve amerikane për të bërë presion ndaj Kremlinit që të pajtohej me kushtet e vendosura nga Shtëpia e Bardhë.

Përgatiti për Hashtag.al, Klodian Manjani