Vendosni fjalën kyçe....

Mesazhi i Vjosa Osmanit: Kosova do të vazhdojë të jetë në krah të Shqipërisë në të mirë të interesit të përbashkët


Presidentja e Kosovës, Vjosa Osmani-Sadriu ka uruar shqiptarët me rastin e 28 nëntorit, Ditës së Flamurit.

Përmes një postimi në rrjetin social Facebook, Osmani është shprehur se më 28 nëntor të vitit 1912, populli shqiptar kurorëzoi aspiratën për Shqipërinë e pavarur, që së bashku me ngritjen e flamurit në Vlorë i konsideron akte të shenjta të historisë sonë të përbashkët.

Por Osmani shton kjo datë ka shumë peshë historike, pasi gjithashtu në këtë ditë ka lindur komandanti legjendar Adem Jashari dhe po në këtë ditë, UÇK-ja u paraqit për herë të parë publikisht.

MESAZHI I OSMANIT

Më 28 nëntor të vitit 1912, populli shqiptar e kurorëzoi aspiratën për Shqipërinë e pavarur. Ky akt së bashku me ngritjen e flamurit në Vlorë janë akte të shenjta të historisë sonë të përbashkët, të cilën e ndërtuam me mund dhe sakrifica.

Kjo datë ka shumë peshë historike. Në këtë ditë ka lindur komandanti legjendar Adem Jashari dhe po në këtë ditë, Ushtria Çlirimtare e Kosovës u paraqit për herë të parë publikisht. Të dy këto ngjarje i japin edhe më shumë kuptim nëntorit, sepse bartin në vete frymën e lirisë, idealin e brezave që nga Skënderbeu, Ismail Qemajli, Isa Boletini e shumë patriotë të tjerë.

Në 109- vjetorin e pavarësisë, uroj që Shqipëria krahas Kosovës të ketë sukses në të gjitha fushat! Kosova do të vazhdojë të jetë në krah të Shqipërisë në të mirë të interesit të përbashkët, duke thelluar më tej lidhjet tona ndërmjet motrave e vëllezërve, sikurse edhe ato strategjike!

Gëzuar Dita e Flamurit, urime dita e Pavarësisë së Shqipërisë!

Zoti i bekoftë Republikën e Shqipërisë dhe Republikën e Kosovës!