Policia e Lezhës ka sqaruar në një njoftim të dytë aksidentin e ndodhur mbrëmjen e djeshme në aksin Milot-Thumanë ku u përfshi edhe makina që shoqëronte Sali Berishën në foltoren e Kurbinit.
Uniformat blu kanë arrestuar 24-vjeçarin banues në Prishtinë pasi ku shtetas ka goditur eskortën e Berishës duke qarkulluar në sens të njëjtë në autostradë.
Me këtë qëndrim policia ka hedhur poshtë deklaratën e truprojës së Berishës i cili mbrëmjene djeshtme deklaroi se makina që i përplasi po ecte në sens të kundërt me ta.
Nga përplasja janë lënduar drejtuesi i makinës nga Prishtina dhe dy pasagjerët banues në Kosovë.
Njoftimi i plotë:
Specialistët e Qarkullimit Rrugor në Drejtorinë Vendore të Policisë Lezhë proceduan penalisht shtetasin A.M., 24 vjeç, banues në Prishtinë, Kosovë.
Ky shtetas, në aksin rrugor Milot-Thumanë, në Fushë Mamurras, duke drejtuar automjetin tip “Benz ” ka goditur mjetin tjetër tip “Benz ” me drejtues shtetasin S.L., 28 vjeç, banues në Tiranë dhe ky i fundit ka goditur mjetin shoqërues të deputetit S.B. Të 3 automjetet qarkullonin në një sens lëvizjeje, në korsinë e shpejtësisë.
Si pasojë e goditjes kanë marrë dëmtime të lehta drejtuesi i mjetit shtetasi A.M., dhe pasagjerët në këtë mjet E.S.,dhe A.M., banues në Kosovë, të cilët pasi kanë marrë mjekim në spital, janë larguar për në banesë.
Materialet hetimore u referuan në Prokurorinë e Rrethit Gjyqësor Kurbin, për veprime të mëtejshme, për veprën penale “Shkelja e rregullave të qarkullimit rrugor “.
