Vendosni fjalën kyçe....

Gjykata Kushtetuese rrëzon kërkesën e Shoqatës së Bashkive për zgjedhjet e “30 Qershorit”


Gjykata Kushtetuese ka rrëzuar kërkesën e Shoqatës së Bashkive për të shpallur të pavlefshme zgjedhjet lokale të 30 qershorit dhe ripërsëritjen e tyre.

Kujtojmë se zgjedhjet lokale të 2019-ës u zhvilluan pa praninë e opozitës së bashkuar, e cila i bojkotoi ato zgjedhje. Presidenti Ilir Meta kishte shpallur një dekret që i anulonte zgjedhjet në 30 qershor, duke shpallur si datë tjetër për zgjedhjet 13 tetorin. Mirëpo zgjedhjet u mbajtën gjithsesi vetëm me kandidatët e maxhorancës.

Shoqata e Bashkive kishte kërkuar nga Gjykata Kushtetuese anulimin e këtyre zgjedhjeve dhe ripërsëritjen e tyre. Gjykata Kushtetuese i ishte drejtuar për këtë Komisionit të Venecias për të marrë një opinion final.

NJOFTIMI I KUSHTETUESES

Gjykata Kushtetuese e Republikës së Shqipërisë mori në shqyrtim në seancat plenare publike në datat 23.06.2021 dhe 02.11.2021 çështjen me palë kërkuese Shoqata e Bashkive të Shqipërisë, me objekt:
1. Konstatimin antikushtetues të zgjedhshmërisë/procesit zgjedhor të zhvilluar në 30 qershor 2019 për zgjedhjen e organeve të qeverisjes vendore, të kryetarëve të bashkive dhe anëtarëve të këshillave bashkiakë, dhe si rrjedhojë konstatimin antikushtetues të zgjedhjes së anëtarëve të këtyre organeve.
2. Verifikimin e kushtetutshmërisë së veprimtarisë së partisë Bindja Demokratike në lidhje me regjistrimin e saj në gjykatë dhe zgjedhjet e datës 30 qershor 2019.

Gjykata Kushtetuese, pasi dëgjoi palët ndërgjygjëse në gjykimin kushtetues, mori në shqyrtim opinionin amicus curiae të Komisionit të Venecies,

VENDOSI:

– Rrëzimin e kërkesës.

Vendimi përfundimtar do të shpallet i arsyetuar brenda afateve ligjore të parashikuara nga ligji nr. 8577, datë 10.02.2000 “Për organizimin dhe funksionimin e Gjykatës Kushtetuese të Republikës së Shqipërisë”, i ndryshuar.