Vendosni fjalën kyçe....

Vinte baste online në lokalin e tij, arrestohet 32-vjeçari në Gjirokastër


Një 32-vjeçar në Gjirokastër është arrestuar nga policia për ushtrimin e lojërave të fatit në lokalin e tij.

Mësohet se në lagjen “18 shtatori” gjatë kontrollit të ushtruar në lokalin e marrë me qira nga 32-vjeçari Alkend Haskaj, janë sekuestruar disa celularë ku kishte faqe online të basteve sportive. Akuzat e policisë janë se nëpërmjet celularit, Haskaj ushtronte aktivitetin e lojrave të fatit në kundërshtim me ligjin.

Njoftimi i policisë:

Në vijim të punës për goditjen e veprimtarisë kriminale të ushtrimit të paligjshëm të lojërave të fatit, specialistët e Seksionit për Hetimin e Krimeve në Komisariatin e Policisë Gjirokastër, në bashkëpunim me Seksionin e Hetimit të Krimit Ekonomiko-Financiar, arrestuan në flagrancë shtetasin A. H., 32 vjeç, banues në Gjirokastër.

Shtetasi A. H. u arrestua pasi, në lagjen “18 Shtatori” gjatë kontrollit të ushtruar në lokalin (bar-kafe) të marrë me qera nga ky shtetas, është gjetur dhe sekuestruar në cilësinë e provës materiale një aparat celular, ku dyshohet se përmbante faqe online të basteve sportive dhe nëpërmjet këtij aparati ushtronte veprimtarinë e lojrave të fatit në kundërshtim me ligjin.

Materialet i kaluan Prokurorisë së Rrethit Gjyqësor Gjirokastër, për veprën penale “Organizim i llotarive të palejuara”.