Boksieri britanik Amir Khan është nxjerrë nga avioni në SHBA, pas një sherri për maskën e fytyrës.
Lajmin e dha vetë Khan përmes një videoje, ku ai thotë ishte zbritur nga policia nga avioni i “American Airlines” së bashku me një koleg, kur dikush në bord u ankua se maska e mikut të tij nuk ishte vendosur “si duhet”.
Linja ajrore tha se fluturimi nga Aeroporti i Newark për në Dallas-Fort Worth u ndalua dhe avioni u kthye mbrapsht, pasi dy persona thuhet se “refuzuan të pajtohen me kërkesat e ekuipazhit”. Por u mohua të kishte patur ndërhyrje të policisë.
Një zëdhënës i linjës ajrore sipas BBC-së tha: “Ekipi ynë i marrëdhënieve me klientët po kontakton me Khan për të mësuar më shumë rreth përvojës së tij dhe për të përforcuar rëndësinë e politikave të zbatuara për sigurinë e klientëve dhe ekuipazhit tonë.”
Në një video të postuar në “Twitter”, Khan tha se ai po fluturonte në një kamp stërvitor në Kolorado pas një qëndrimi në Nju Jork dhe kishte mbetur “i neveritur” nga mënyra si ishte trajtuar.
Ish-kampioni botëror i peshave të lehta tha: “Unë u nxorra nga avioni sot kur po shkoja në kampin stërvitor në Colorado Springs, nga policia.”
Ai shtoi: “Padyshim që një ankesë u bë nga stafi i American Airlines, ata thanë që maska e kolegut tim nuk ishte mjaft e lartë dhe se ata duhej të ndalonin avionin dhe të më nxirrnin mua dhe shokun tim kur nuk po bëja asgjë të keqe. Ata na dëbuan të dyve, unë isha ulur në 1A, ai ishte ulur në 1B – më duket kaq e neveritshme dhe kaq mosrespektuese, më duhej të shkoja në Kolorado për një kamp stërvitor dhe tani jam përsëri në Nju Jork dhe një ditë tjetër.
Tani më duhet të riplanifikoj një fluturim tjetër për të udhëtuar përsëri në kampin stërvitor, që është vërtet shqetësuese. Kjo ishte pa asnjë arsye dhe unë jam shumë i neveritur që American Airlines do të na e bënte këtë dhe do të më ndalonte të udhëtoja.”
Në fund Khan shton se do të donte të dilnin pamjet nga avioni, që të vërtetohet se ai dhe shoku i tij nuk kanë bërë asgjë të keqe dhe se janë zbritur padrejtësisht.
Disgusted to be banned by @AmericanAir and @traveloneworld for not been able to fly to training camp, i got escorted by police off the plane for no reason. I would like to see evidence for any wrong doings! #AAteam #Notallterrorists pic.twitter.com/dL3UfFcYYl
— Amir Khan (@amirkingkhan) September 18, 2021
