Vendosni fjalën kyçe....

Protestat në Kubë, Rusia bën thirrje kundër ndërhyrjeve të jashtme


Zëdhënsja e Ministrisë së Jashtme ruse, Maria Zakharovama

Rusia ka paralajmëruar të hënën kundër ndonjë “ndërhyrjeje të jashtme” në Kubë, pasi mijëra persona kanë marrë pjesë në protesta të rralla kundër Qeverisë komuniste.

“Ne e konsiderojmë të papranueshme ndonjë ndërhyrje eventuale në çështjet e brendshme të shtetit sovran, apo ndonjë veprim destruktiv që do të inkurajonte destabilizimin e situatës në këtë ishull”, ka thënë zëdhënësja e Ministrisë së Jashtme ruse Maria Zakharova, përmes një deklarate, transmeton agjencia e lajmeve AFP.

Ajo nuk ka sqaruar kush mund të jetë duke ndikuar në Kubë, mirëpo paralajmërimi duket se u është drejtuar Shteteve të Bashkuara, të cilat i kanë bërë thirrje Kubës të mos shënjestrojë protestuesit.

“Ne jemi duke përcjellë nga afër zhvillimet e situatës, në dhe rreth Kubës”, ka thënë Zakharova.

“Ne jemi të bindur se autoritetet kubane janë duke marrë të gjithë hapat e nevojshëm për të rikthyer rendin publik në interes të qytetarëve të shtetit dhe brenda kornizës kushtetuese”, ka thënë mes tjerash ajo.

Kuba ka qenë aleate e rëndësishme e ish-Bashkimit Sovjetik në Luftën e Ftohtë dhe Moska ka vazhduar të ketë marrëdhënie të mira diplomatike me Havanan, prej shpërbërjes së ish-Bashkimit Sovjetik më 1991.

Protestat në Kubë janë duke u konsideruar ndër më të mëdhatë në dekada, kundër Qeverisë.

Protestuesit kanë marshuar nëpër qytete, duke bërtitur kundër “diktaturës”.

Në disa pamje nëpër rrjetet sociale janë parë forcat e sigurisë duke ndaluar dhe rrahur disa protestues.

Kubanët janë zemëruar nga gjendja ekonomike, kufizimet në liritë civile, si dhe menaxhimi që u kanë bërë autoritetet pandemisë së koronavirusit.