Partia Demokratike ka denoncuar dekonspirimin e aksionit të prokurorisë lidhur me tenderin e uniformave të policisë.
Në një deklaratë nga selia blu, deputeti i zgjedhur Alibeaj tha se PD e ka denoncuar këtë aferë që në krye të herës, por ministri i Brendshëm asokohe, Lleshaj i quajti shpifje qëndrimet e selisë blu.
“Sot, edhe njëherë, koha i dha të drejtë Partisë Demokratike në betejën në mbrojtje të interesit publik.
Dy vite më parë, nga kjo foltore, ne kemi denoncuar aferën korruptive që fshihej pas tenderit të Ministrisë së Brendshëm për uniformat e policisë. Atë kohë Sandër Lleshaj tha se ne po shpifnim dhe se nuk njihnim ligjin në fuqi. Madje, ministri i Ramës, që ka shpenzuar 350 euro nga taksat e shqiptarëve për një kapele, shkoi deri aty sa të padisë Partinë Demokratike për shpifje, duke kërkuar përgënjeshtrim të deklaratës dhe shpërblim me shumën 1 milionë lekë nga Partia Demokratike. Paradoksalisht, teksa e vërteta po shpaloset përpara shqiptareve, gjyqi i ngritur nga ata që vodhën miliona euro me një tender, vazhdon. Sjellja në kujtesë e momentit të parë të denoncimit të kësaj afere, është një ilustrim i domosdoshëm për të kuptuar jo vetëm pafytyrësinë e atyre që teksa vjedhin kërkojnë të mbyllin gojën e opozitës me gjyqe propagandistike, por edhe shënjestrën e vërtetë që duhet të ketë ky aksion.” – tha Alibeaj.
Demokrati shtoi më tej se të gjithë ata që kanë shkelur ligjin duhet të dalin para drejtësisë duke theksuar se një aferë e këtyre përmasave s’mund të kryhet nga zyrtarë të dorës së dytë.
Alibeaj tha se PD është në dijeni për faktin se Ministria e Brendshme është njoftuar për këtë operacion tre ditë më parë duke u dhënë mundësinë përsonave të përfshirë që të fshehin provat duke përfshirë këtu drejtoreshën e Prokurimeve Edlira Naqellari, e larguar nga pozicioni tetë ditë më parë.
“Sigurisht çdo person që shkel ligjin duhet të dalë përpara drejtësisë një orë e më parë, por është e qartë për të gjithë shqiptarët se një aferë e këtyre përmasave nuk mund të kryhet nga zyrtarë të dorës së dytë. Partia Demokratike është dijeni për faktin që Ministria e Brendshme është njoftuar për këtë operacion tre ditë më parë, duke u dhënë të përfshirëve në këtë aferë të gjitha mundësitë për të fshehur provat. Ndërsa Edlira Naqellari, drejtoresha e prokurimeve në Ministrinë e Brendshme, e njohur si një person pranë Ramës dhe e emëruar në këtë post prej tij, u largua nga ky pozicion vetëm 8 ditë më parë. Të gjitha këto përbëjnë këmbena të forta alarmi për dekonspirimin e operacionit, nëpërmjet të cilit përgjegjësia për milionat e vjedhura të mos mbërrije te nivelet më të larta të qeverisë.” – shtoi Alibeaj.
Në fund, deputeti tha se ky operacion s’mund të ndodhte pa përfshirjen e Sekretarit të Përgjithshëm asokohe, Plarent Ndreca, ministrit të Brendshëm Sandër Lleshaj e kryeministrit Rama.
“Kjo është e pafalshme! Sepse nuk ka shqiptar që të mos dijë se një operacion korruptiv të këtyre përmasave, nuk mund të ndodhte pa përfshirjen e Sekretartit të Përgjithshëm të Ministrisë së Brendshme Plarent Ndreca, një operacion korruptiv i këtyre përmasave nuk mund të ndodhte pa përfshirjen e Ministrit të Brendshëm Sandër Lleshaj, një operacion korruptiv i këtyre përmasave nuk mund të ndodhte pa përfshirjen e Edi Ramës. Goditja e kësaj afere nuk mund të konsiderohet e plotë, nëse drejtësia nuk troket te dera e Plarent Ndrecës, Sandër Lleshaj dhe Edi Ramës. Kthimi i Shqipërisë në një shtet të kapur nga korrupsioni, sikurse dëshmojnë raportet e shumta ndërkombëtare, ka vetëm një përgjegjës. Shqiptarët që varfërohen përditë nga ky regjim i korruptuar e dinë se përgjegjësi I vetëm është Edi Rama. Shqiptarët e dinë që peshku qelbet nga koka!” – mbylli deklaratën Alibeaj.
