Policia ka publikuar pamjet nga brenda apartamentit të marrë me qira në Tiranë që ishte kthyer në një laborator të mirëfilltë droge.
Po ashtu zbulohen edhe emrat e katër personave të arrestuar në kuadër të këtij operacioni të koduar “kimisti”.
Ata janë Gerhard Duro, Skender Ismaili, Ervin Shametaj dhe një i mitur 17-vjeç me iniciale J.V.
Këta persona akuzohen se në bashkëpunim me njëri-tjetrin, e kishin përshtatur banesën e marrë me qira nga Ervin Shametaj me aparatura që shërbejnë për kultivimin e bimëve narkotike.
Operacioni për zbulimin e këtij grupi ka nisur mesditën e djeshme, kur policia ka ndaluar për kontroll automjetin e Ervin Shametit, prej ku ka sekuestruar disa kubikë kanabis.
Më pas, është ushtruar kontroll në banesën e marrë prej tij me qira, brenda së cilës është zbuluar se në dy dhoma kishte të kultivuar kanabis me llamba led. Personave iu sekuestruan fidanët e kanabisit, fara kanabisi, një peshore elektrike, dy automjete si dhe sende të tjera.
