Ka përfunduar në Gjykatën e Shkallës së Parë në Vlorë seanca gjyqësore për Martin Kapllanaj, të miturin që grabiti me armë një argjendari në Vlorë pak ditë më parë. Gjykata vendosi masën e sigurisë “arrest me burg” për 17-vjeçarin.
Duke qenë se Kapllanaj është i ditëlindjes 23 12 2003, pra 17-vjeç, seanca është gjykuar nga gjyqtarja Vjola Canaj, që merret me çështjet e minorenëve dhe është zhvilluar me dyer të mbyllura.
Ngjarja ndodhi paraditen e 29 Prillit, rreth orës 11:05 ku Kapllanaj i maskuar me syze dhe kapele nën kërcënimin e një arme “shotgun” që kishte me vete arriti të merrnte disa bizhuteri me vlerë duke i futur në një çantë.
E gjithë skena u filmua live nga gazetari i “News 24” Enrik Mehmeti. Familjarët e adoleshentit disa javë përpara ngjarjes, në fillim të Prillit kishin bërë një denoncim në polici se djali i tyre ishte pleksur në shoqëri të keqe. Ata dyshonin se Martini 17-vjeç ishte pjesë e një grupi grabitësish kryesisht adoleshentë, që drejtohen nga të tjerët.
I mituri ishte prej ditësh i larguar nga shtëpia dhe jetonte me shokët e tij në banesë në Vlorë.