Ambasada e SHBA në Tiranë ka zbardhur detaje nga takimi i ambsadores Yuri Kim me Presidentin Ilir Meta, kryeministrin Edi Rama dhe kryedemokratin Lulzim Basha, në Presidencë.
Ambasada thekson se i pranishëm në takim ka qenë edhe Zëvendëskomandant Gjeneral i Ushtrisë së SHBA në Evropë, Gjeneral Major Joseph Jarrard, i cili ka diskutuar me krerët e politikës shqiptare për vazhdimin e punimeve “për të ndërtuar gatishmërinë dhe ndërveprimin tonë nëpërmjet stërvitjeve të ardhshme ushtarake të SHBA, me ushtarë shqiptarë dhe në tokën shqiptare”.
Për këtë takim edhe Presidenca ka zbardhur objektin dhe qëllimin që si duket ka qenë përtej konsumit të politikës së ditës dhe të brendshme.
Presidenca thotë se sot është zhvilluarmbledhja e Këshillit të Sigurisë Kombëtare e thirrur nga Presidenti i Republikës, Ilir Meta.
Mbledhja kishte për qëllim të diskutonte masat përgatitore në lidhje me fazën përmbyllëse të stërvitjes me trupa, të koduar “Defender Europe 21/DE21”, e planifikuar për t’u zhvilluar në rajonin tonë, përfshirë Shqipërinë, nga data 1 maj deri më 14 qershor 2021.
Të pranishëm në takim ishin Kryeministri, Edi Rama, Kryetari i Partisë Demokratike, Lulzim Basha, anëtarë të qeverisë dhe titullarë të agjencive ligjzbatuese e të sigurisë në vend.
Qëllimi i këtij takimi, ishte koordinimi i masave paraprake, me objektivin e qartë, që faza përmbyllëse e kësaj stërvitje të madhe të realizohet me sukses të plotë.
Në këtë mbledhje, Presidenti Meta falenderoi Shtetet e Bashkuara të Amerikës dhe përfaqësuesit e saj në Tiranë, për mbështetjen e pakursyer për vendin tonë në të gjitha aspektet e veçanërisht në fushën e mbrojtjes dhe të sigurisë.
“NATO dhe partneriteti strategjik me SHBA janë shumë të rëndësishme për Shqipërinë dhe Ballkanin. Besimi i popullit shqiptar dhe mbështetja ndaj tyre janë unanime, ashtu sikundër edhe vokacioni europian i Shqiptarëve”, – tha Presidenti Meta.
