Vendosni fjalën kyçe....

PD: Gjovalin Loka ka qenë punonjës i sigurimit të shtetit, sipas ligjit duhej dëbuar nga policia


Partia Demokratike ka denoncuar konfirmimin në detyrë të numrit dy të Policisë së Shtetit, Gjovalin Loka.

Nëpërmjet një deklarate për shtyp nga selia blu, Alibeaj, tha se konfirmimi në detyrë i operativit të sigurimit të shtetit është shembull flagrant i kriminalizimit të policisë nën drejtimin e kryeministrit Rama.

Alibeaj theksoi se shkelja e rëndë e ligjit për të mbajtur në punë njerëz të sigurimit të shtetit është tregues i shndërrimit të policisë në një organizatë në shërbim të partisë-shtet e jo qytetarëve.

“Me mbajtjen në krye të policisë së shtetit të Gjovalin Lokës, kundër ligjit të vettingut në polici, policia e shtetit i është dorëzuar pa kushte organit që mbajti nën terror vendin për 45 vjet. Mënyra si ajo i trajton e dhunon qytetarët janë metodat që ka zbatuar sigurimi i shtetit. Loka do duhej të dëbohej nga policia për faktin e thjeshtë se ligji i vettingut në polici, shkruan e bardha në të zezë në nenin 38 shkronja G se qenia anëtar i ish-sigurimit të shtetit përbën kush skualifikues. Një fakt i tillë është i dekomentuar zyrtarisht nga autoriteti i dosjeve.” – tha ndër të tjera Alibeaj.

Deklarata

Konfirmimi në detyrë i numrit 2 të Policisë operativit të Sigurimit të Shtetit, Gjovalin Loka, është një shembull flagrant i kriminalizimit të Policisë nën drejtimin e Edi Ramës.

Shkelja e rëndë e ligjit për të mbajtur dhe promovuar në Polici njerëzit e Sigurimit është tregues i shndërrimit të policisë në një organizatë në shërbim të partisë shtet dhe jo të qytetarëve.

Me mbajtjen në krye të policisë të Gjovalin Lokës kundër ligjit të vetingut, Policia e Shtetit i është dorëzuar pa kushte organit që mbajti nën terror vendin për 45 vjet. Mënyra armiqësore në sjelljen me qytetarët, metodat që përdor për të shtypur, dhunuar, rrahur, e nëpëkëmbur qytetarët janë tregues i zaptimit të Policisë nga ish sigurimsat.

Numri 2 i Policisë së Shtetit do të duhej të dëbohej nga Policia, së paku për arsyen se ligji i vetingut në polici, shkruan e bardha mbi të zezë, në nenin 38 pika “g” se qenia “anëtar i ish-sigurimit të shtetit” përbën kusht skualifikues.

Një fakt i tillë është i dokumentuar zyrtarisht nga Autoriteti i Dosjeve.

Jo vetëm kaq! Numri 2 i Policisë së Shtetit do të duhej të dëbohej edhe për faktin, se e fshehu një fakt të tillë në formularët e vetëdeklarimit. Neni 62 i ligjit të vetingut në polici përcakton, shprehimisht, se mospasqyrimi i të dhënave përbën në vetvete shkak për shkarkim nga detyra.

Për të mbrojtur një anëtar të Sigurimit të Shtetit, në shkelje të rëndë të ligjit, Drejtori i Përgjithshëm i Policisë, Ardi Veliaj ka mashtruar publikisht duke shpërdoruar detyrën. Ne disponojmë dokumentat e plotë që e provojnë këtë mashtrim.

Instituti i Studimit të Krimeve dhe Pasojave të Komunizmit i ka kërkuar informacion Ardi Veliut për të dhënat mbi anëtarët e ish-Sigurimit të Shtetit, të cilët janë ende në radhët e Policisë së Shtetit.

Ky është dokumenti, në të cilin Drejtori i Përgjithshem ka guxuar të mashtrojë dhe të mohojë me shkresë zyrtare ekzistencën e ish sigurimsave në Policinë e Shtetit, kur zëvendëzi i tij, Gjovalin Loka jo vetëm ka ka kryer Shkollën e Sigurimit, por edhe ka punuar operativ i Sigurimit të Shtetit të diktaturës komuniste.

E vërteta është se ekspertët llogarisin se në këto 7 vjet e gjysëm, janë më shumë se 500 sigurimsa të tjerë që janë rifutur dhe punojnë në nivele të larta të strukturës së Policisë së Shtetit.

Tallja me ligjin, kompromentimi kriminal i Policisë së Shtetit duke ringjallur jo vetëm në metoda, por edhe në personel njerëzor ish-Sigurimin e Shtetit është një këmbanë alarmi se projekti politik i Edi Ramës nuk ka lidhje me demokracinë dhe shtetin ligjor.

Kjo është një arsye më shumë përse shqiptarët, në rastin më të parë, do ta rrëzojnë me votë këtë regjim autokratik, duke i dhënë vetes një shans real për të zgjedhur një qeveri dhe kryeministër normal, që ka të parin interesin e qytetarëve.


Leave a Reply

Your email address will not be published. Required fields are marked *