Presidenti Meta i ka uruar shërim të shpejtë kryebashkiakut të Tiranës, Veliaj, i cili njoftoi se ishte prekur nga Covid-19.
Kreu i shtetit bën thirrje për respektimin e protokolleve sëndetësore dhe rritjen e efikasitetit të masave mbrojtëse.
Ai thekson gjithashtu se rritjet e rasteve me të prekur e viktima kërkojnë strategji më efikase e transparente për përballimin e pandemisë së rrezikshme.
Në fund Meta bën thirrje për shtimin e masave mbrojtëse për mjekët e infermierët.
“Duke i uruar shërim sa më të shpejtë Kryetarit të Bashkisë së Tiranës, z.Erion Veliaj dhe shëndet të plotë familjes së tij, apeloj me forcë rëndësinë jetike të respektimit të protokolleve shëndetësore, si dhe rritjes së efikasitetit të masave mbrojtëse përmes ndërgjegjësimit, transparencës dhe gjithëpërfshirjes, për parandalimin e përhapjes së mëtejshme të pandemisë COVID-19.
Ritmet shqetësuese të shtimit të rasteve të qytetarëve të prekur, fatkeqësisht edhe të numrit të viktimave, shtrojnë si domosdoshmëri një strategji më efikase dhe transparente, për përballimin e pasojave të rënda të kësaj pandemie të rrezikshme.
U bëj thirrje të gjithë qytetarëve të zbatojnë udhëzimet e bëra publike për mbajtjen e maskave dhe respektimin e distancave fizike, veçanërisht me afrimin e pikut të sezonit turistik. Gjithashtu, është tepër e nevojshme garantimi i masave mbrojtëse për mjekët, infermierët dhe personelin mbështetës, të cilët janë në vijën e parë të frontit, duke sakrifikuar, deri edhe me jetën e tyre, në mbrojtje të shëndetit të çdo qytetari.” – shkruan Meta.
