Arrihet marrëveshja e koalicionit mes AAK-së dhe Lidhjes Demokratike të Kosovës. Lajmin e ka bërë me dije kryetari i AAK-së, Ramush Haradinaj, pas takimit që kishte me liderin e LDK-së, Isa Mustafa.
Në një deklaratë për mediat, Haradinaj tha se partia e tij do marrë 4 ministri dhe do ketë edhe një zëvendëskryeministër në qeveri.
Ai tha se AAK do të mbajë përgjegjësi për politikën e jashtme ndërsa konfirmoi se Zëvendëskryeministër i parë do të jetë Besnik Tahiri, e Ministre e Punëve të Jashtme, Meliza Haradinaj.
“Kemi arrit drejt krijimit të qeverisë. Siç e dini, tani është praktikë kur arrihet koalicioni që krijohet një lidhje në politikë të jashtme, kur marrin pjesë dy partnerët, e marrin njëri njërën, e tjetri tjetrën. Në rendin e sigurisë po ashtu, një ndarje. Në Ekonomi dhe në Ministrisë e tjera, Aleanca në këtë qeveri mban përgjegjësi për politikën e Jashtme, pra për Ministrinë e Jashtme, Drejtësisë, të Zhvillimit Ekonomik dhe të Arsimit. Edhe emrat jua kam bërë me dijeni me kohë.
Janë si vijon:
Zëvendëskryeministër i parë, Besnik Tahiri
Ministre e Jashtme, Meliza Haradinaj
Ministër i Drejtësisë, Selim Selimi
Ministër i Zhvillimit Ekonomi, Blerim Kuçi
Ministër i Arsimit, Ramë Lika”– tha Haradinaj.