Koronavirusi ka futur në vetëizolim edhe presidentin e Parlamentit Europian, David Sassoli. Këtë të martë, Sassoli tha se ai ishte futur në vetëizolim në shtëpinë e tij në Bruksel, si masë paraprake për shkak se ai kishte udhëtuar në Itali.
“Parlamenti do të vazhdojë të punojë për të ushtruar detyrat e tij. Asnjë virus nuk mund të bllokojë demokracinë”– tha Sassoli, citon Reuters.
Parlamenti Evropian të hënën vendosi të shkurtojë mbledhjen e tij mujore për shkak të shqetësimeve që qindra eurodeputetë të ulur së bashku mund të përhapnin koronavirusin.
Seanca plenare fillimisht ishte planifikuar të mbahej në Strasburg, Francë, por u anulua për shkak të shqetësimeve se udhëtimi atje do të rriste rreziqet e koronavirusit.
