Policia ka publikuar informacionet zyrtare lidhur me situatën e krijuar në Fier, ku një numër i madh nxënësish janë dërguar në spital me shenja helmimi. Sipas policisë shkak për helmimin dyshohet se është bërë një nxënës i cili ka hedhur sprajt piperi.
“Sot rreth orës 11:10, në spitalin Rajonal Fier kanë shkuar për kontroll mjekësor disa nxënës të një shkolle të mesme që kanë pasur probleme me frymëmarrjen.
Menjëherë në vendngjarje kanë shkuar shërbimet e Policisë dhe grupi hetimor dhe nga veprimet e para të kryera në bashkëpunim të ngushtë me Prokurorinë Fier, Drejtorinë Arsimore dhe Drejtorinë e Shkollës, paraprakisht dyshohet se është përdorur sprajt piperi nga një nxënës i kësaj shkolle.
Grupi hetimor nën drejtimin e Prokurorisë vijon veprimet për të zbardhjen e plotë të kësaj ngjarje.”- thuhet në njoftimin e policisë.
Numri zyrtar i nxënësve të helmuar nuk dihet, por mendohet se numri i tyre është rreth 30. Ngjarja e rëndë ka ndodhur në shkollën “Janar Kilica” në Fier, e njëjta shkollë ku rreth një javë më parë ndodhi një situatë e ngjashme por me më pak nxënës të helmuar. Në rastin e parë u tha se shkak ishte bërë një eksperiment në laboratorin e kimisë.
Deri më tani nuk ka asnjë reagim zyrtar nga ministrja e Shëndetësisë, spitali i Fierit apo stafi i shkollës./Hashtag.al
