Pas zgjedhjes nga Kuvendi me 98 vota të Artur Metanit si Inspektor i Lartë i Drejtësisë, ka reaguar Partia Demokratikë.
Emërimi i Metanit në krye të ILD-së, PD-ja e konsideron si vulë të dështimit të reformës dhe kapjen e drejtësisë.
Më tej, PD-ja sqaron se emërimi i tij është në shkelje të Kushtetutës pasi është emërim politik për shkak se është vëllai i deputetes socialiste Englantina Gjermeni.
Postimi i plotë:
Artur Metani, shërbëtor i Edi Ramës në drejtësi. Emërimi i tij vulos dështimin e reformës, kapjen dhe politizimin e drejtësisë.
Sot u emërua si Inspektor i Lartë i Drejtësisë vartësi i Edi Ramës, vëllai i ish ministres dhe deputetes së tij. Artur Metani, që duhet të garantojë pavarësinë e drejtësisë nga politika, u emërua sot në kundërshtim me Kushtetutën dhe ligjet.
Sot është një ditë e keqe për demokracinë dhe drejtësinë në Shqipëri.
Emërimi i Artur Metanit në krye të Inspektoriatit të Lartë të Drejtësisë, në kundërshtim me Kushtetutën dhe ligjet, është një emërim partiak në një nga pikat kyçe të sistemit të drejtësisë, që verifikon dhe nis hetime për të gjithë gjyqtarët, prokurorët, si dhe për anëtarët e Këshillit të Lartë Gjyqesor dhe atë të Prokurorisë.
Vartës i Edi Ramës për vite me radhë, Artur Metani nuk do t’i shërbejë drejtësisë së pavarur. Ai është emëruar aty për të qenë shërbëtor i Edi Ramës. Me këtë emërim Edi Rama investohet personalisht kundër prokurorëve dhe gjyqtarëve që gjykojnë dosjet e korrupsionit, vjedhjen e votave nga qeveria e Edi Ramës apo lidhjet e tij me krimin e organizuar.
Emërimi i Artur Metanit, një militanti partiak, vartës i Ramës, vëlla i deputetes dhe ish ministres së Ramës është një tjetër zhgënjim i thellë për të gjithë shqiptarët që prisnin drejtësi të pavarur nga reforma në drejtësi e cila, me hapin e sotëm është pranë vdekjes klinike.
