Kryetari i Lidhjes Demokratike të Kosovës, Isa Mustafa, ka mbajtur konferencë për media pas takimit që ka pasur me Këshillin e Përgjithshëm të partisë së tij, ku është diskutuar për koalicionin e mundshëm me VV-në.
Në këtë konferencë, Mustafa ka theksuar se nëse nuk arrihet marrëveshja LDK – VV, partia e Mustafës do të shkojë në opozitë.
“Edhe Vetëvendosja na ka pyetur a keni plan “B”, ne i kemi thënë se nëse nuk arrijmë marrëveshjen, plani “B” i joni është të shkojmë në opozitë. Nuk kemi plan tjetër dhe nuk do të marrim hap tjetër. Nëse e bëjmë qeverinë me VV-në, e bëjmë, nëse jo atëherë nuk pranojmë të mandatohemi nga Presidenti”, ka thënë Mustafa.
Mustafa po ashtu tha se ka hapësirë për t’u përpjekur që të arrihet marrëveshja me VV-në e Albin Kurtit.
“Kemi hapësirë të bëjmë përpjekje, të gjejmë gjuhë të përbashkët. S’kemi arsye të prolongojmë takimet dhe arritjen e marrëveshjes”- ka theksuar Mustafa.
