Policia ka zbuluar dy shuma të tjera parash nga ato që u grabitën në aeroportin e Rinasit, më 9 prill 2019.
Mesohet se një pjesë e parave janë gjetur në banesën Elton Piklit, bëhet fjalë për rreth 5 mijë euro, ndërsa një pjesë tjetër parash i janë gjetur të atit të Renaldo Sulës, edhe ky i arrestuar për grabitjen.
Sipas BalkanWeb, paratë e gjetura kanë rezultuar se i përkasin një prej bankave të nivelit të dytë.
Nga ana tjetër, gjykata ka pranuar kërkesën e prokurorisë për marrjen e kampionit për të bërë analizën e ADN për Elton Piklin dhe Oltian Veselin, ndërsa ky i fundit kishte refuzuar të jepte kampionin për ADN.
Më 9 prill të këtij viti u grabitën thasë me 6 milionë euro brenda aeroportit të Rinasit, teksa lekët ngarkoheshin në avion. Gjatë përplasjes me policinë, mbeti i vrarë Admir Murataj.
Deri më tani për ngjarjen janë arrestuar gjashtë persona të dyshuar: Oltion Veseli, Alkond Bengasi, Renaldo Sula, Elton Pikli, Saimir Cela dhe Ragip Hajdini.
