“Ciao a tutti, belli e brutti” – kështu thuhet në një njoftim të drejtorit të Portit të Durrësit, Agron Tare.
Mesa duket Tare ka dhënë dorëheqjen nga detyra pa u mbushur ende viti, por nuk jep arsyet se pse.
“ Sot mbaron misioni im si Drejtor i Përgjithshëm Ekzekutiv i Autoritetit Portual Durrës;
Që prej marrjes së detyrës si Drejtor i Përgjithshëm Ekzekutiv i Autoritetit Portual Durrës, kam shërbyer më devotshmëri dhe pasion për punën, gjë që e tregojnë rezultatet e deritanishme financiare të këtij institucioni. Dorëhiqem për të vijuar rrugëtimin tim profesional dhe duke i uruar pasardhësit/es tim/e suksese! Nuk mund të lë pa falenderuar ata që më besuan këtë pozicion të rëndësishëm, ekipin e APD-së, bashkëpunëtorë të mi, të afërt e të largët! Ciao a tutti, belli e brutti!”, thuhet në njoftimin e Tares.
Dorëheqja e Tares vjen vetëm pak javë pas Prokuroria e Krimeve të Rënda zgjeroi grupin e personave që mund të kenë gisht në trafikimin e lëndëve narkotike, në kuadër të dosjes së 137 kg heroinë të zbuluara në kontenierët me banane në portin e Durrësit. Nën hetim u vunë dhe disa zyrtarë të Portit të Durrësit.
Agron Tare erdhi në krye të Autoritetit Portual të Durrësit në janar të këtij viti, pas shkarkimit të Afrim Bakajt, i cili e mbante këtë detyrë prej muajit shkurt të vitit 2018.
Tare është diplomuar në Fakultetin e Juridikut në Universitetin e Bolonjës në Itali ndërsa edhe më herët i janë besuar detyra të tjera të rëndësishme. Ai ka punuar në Konsullatën në Stamboll më vitet 2014-2019, ndërsa më parë ka qenë anëtar i Grupit Negociator mbi Marrëveshjen e Stabilizim-Asociimit midis Shqipërisë dhe BE.
