Pas shkëputjes së shkurtër, Sony Pictures dhe Marvel kanë arritur në një marrëveshje për t’u rikthyer sëbashku në një tjetër bashkëpunim, për Spider-Man.
Të Premten, të dyja kompanitë njoftuan se Marvel Studios dhe presidenti i saj, Kevin Feige, do të prodhojnë filmin e tretë për “Spider-Man: Homecoming”.
Aktori Tom Holland do të shfaqet edhe një herë tjetër si hero titullar, shkruan Variety. Gjatë verës, dolën lajmet se Disney, kompania mëmë e Marvel dhe Sony nuk kishin arritur dot në një marrëveshje të re financimi.
Marrëveshja e re u nënshkrua vonë të enjten mbrëma. Në negociata u përfshinë lojtarët më të mirë nga të dyja studiot, duke përfshirë shefin e Sony Pictures Tom Rothman, Feige dhe drejtuesit e Walt Disney Studios Alan Horn dhe Alan Bergman.
Si pjesë e marrëveshjes, Spider-Man do të shfaqet edhe në një film tjetër të ardhshëm të Marvel Studios. Ky lajm i ka gëzuar fansat e filmave të Marvel, të cilët nuk mund të mos i shprehnin ndjesitë e tyre në rrjetet sociale.
Vetë Holland ka reaguar për lajmin, duke publikuar një klip të shkurtër të Leonardo Di Caprios, i cili thotë: “Unë s’po iki. Shfaqja vazhdon”.
