Kryetarja e LSI-së, Kryemadhi, ka deklaruar sot se qytetarët mbështetën dhe i dhanë të drejtë opozitës për vendimet e marra, gjë që u reflektua me mospjesëmarrjen në votimet e 30 qershorit.
Në fjalën e saj në 15 vjetorin e themelimit të LSI-së, Kryemadhi, tha se sot më shumë se kurrë shoqëria shqiptare është e polarizuar dhe pabarazia është rritur.
“Qytetarët i dhanë të drejtë opozitës për 30 qershorin, pasi 80% e tyre braktisën duke mos marrë pjesë në kutitë e votimit. Shqipëria sot ndodhet në pikën më të vështirë. E kam fjalën për thellimin e polarizimit të shoqërisë sone dhe pabarazisë në të.
Nuk është rastësi, as kapitalizëm e as demokraci, fakti që vendi ka mbetur për një periudhë të gjatë pa gjykata. Sot me shumë se kurrë, e ritheksoj se prej regjimit kriminal dhe oligarkik të Rilindjes, ne kemi, nga njëra anë një grusht njerëzish që me tender e pa tender po pasurohen me shpejtësi duke grabitur pasuritë e shqiptarëve të cilët nuk përbejnë më shumë se 1 % të tyre, dhe nga ana tjetër, mbi 80 % të shqiptarëve të braktisur, të zhytur në varfëri që luftojnë tu mbijetojnë sfidave të këtij realiteti.” – tha Kryemadhi.
Më tej ajo shtoi se busulla e LSI-së është integrimi në BE dhe jetë më e mirë për çdo shqiptar dhe në këtë rrugë, asgjë s’mund ta ndalë opozitën.
“Nuk ka forcë që na ndal në përmbushjen e misionit tonë. Busulla jonë është Integrimi në BE, jeta më e mirë për çdo qytetar, pavarësisht bindjeve të tij politike. Për ne mbetet parësore kthimi i besimit tek Shqipëria si shtëpia jonë e përbashkët.” – shtoi ajo.