Bardh Spahia ka folur për herë të parë pas arrestimit të tij. Ai falenderon të gjithë për solidaritetin, ndërsa thekson se nuk lëkundet për asnjë sekondë në qëndrimin e tij.
Ai bën thirrje për qëndresë kundër qeverisë së Ramës, që e konsideron të “keqen që po kthehet duke kapur për fyti demokracinë”.
“VETEM QENDRESE!
Të gjithëve e secilit, miq, kolegë, të njohur e të panjohur, brenda e jashtë vendit, u jam thellësisht mirënjohës për solidaritetin, vëmendjen e mesazhet! E drejta triumfon mbi cdo urdhër politik e keqpërdorim të shtetit, ashtu si vendosmëria për të bërë gjënë e duhur për këtë vend, nuk lëkundet as edhe një sekondë!
Solidariteti njerëzor mbetet sinjali më i qartë se shpresa është e fortë në këtë vend, njëlloj si ndërgjegjësimi se beteja kundër të keqes nuk është e lehtë, por aspak e pamundur!
Nuk jam penduar për asnjë moment për zgjedhjen që të kthehem e të qëndroj në vendin tim!
Për formim e traditë familjare, besoj tek qëndresa përballë të keqes, si rruga për të merituar lirinë e demokracinë. Ajo betejë bëhet vec pastër, pa kthesa e konformizma! Paqja pa drejtësi është diktaturë, e diktatorët vec rrëzohen!
Qëndresa është historia e Shkodrës, e jo përkulja!Jam prane cdo mbrojtesi te lirise te ndaluar padrejtesisht, jam prane cdo qendrestari e ushtari te demokracise qe mbron lirine duke u perballur me dinjitet e kurajo kunder te keqes qe po rikthehet per te mbytur e zene per fyti demokracine ne atdheun tone.
E aty do jem bashke me ta, mirenjohes per sherbimin qe i bejne kombit te vet, me sa te kem mundesi e sa te kem fryme! Respekt për të gjithë qëndrestarët!# Asnjë Hap Pas #Të Bashkuar Ia Dalim#Rama Ik”, shkruan Spahia.
Gjykata e Shkodrës vendosi para dy ditësh, ta lërë në ‘arrest shtëpie” ish-deputetin Bardh Spahia. Ai akuzohet për ngjarjen e ndodhura disa ditë më parë në KZAZ-në e Shkodrës. Momenti i arrestimit të Spahisë shkaktoi shumë debate, për shkak se ndodhi gjatë transmetimit live të emisionit “Open” në Top Channel. Spahia i ishte përgjigjur thirrjes së kreut të grupit parlamentar të PS-së, Taulant Balla, që të shkonte në emision, duke rrezikuar ta arrestonte policia. Gjë që ndodhi.
Qytetarë nga Shkodra protestuan para Policisë së Tiranës ku mbahej ish-deputeti Spahia, duke kërkuar lirimin e tij.