Radio Televizioni i Kosovës ka ndërprerë për pak çaste transmetimin në mes të edicionit qendror të lajmeve mbrëmjen e kaluar, duke e bërë ekranin tërësisht të zi.
Ky veprim është bërë në shenjë proteste ndaj amendamentit që e shndërron këtë media nga transmetues publik në transmetues shtetëror.
Deputetët e Kuvendit në Kosovë votuan dje ligjin për pagat ku është futur edhe RTK, duke mos marrë aspak në konsideratë protestat e shumta të punonjësve, të cilët e kanë kundërshtuar këtë nismë për të ndryshuar pozitën e televizionit dhe statusin e transmetuesit publik që ka aktualisht.
Të njëjtët deputetë nuk e votojnë ligjin e propozuar nga RTK-ja, që sipas televizionit ky veprim lë hapësirë për të dyshuar se ligjvënësit po tentojnë të fusin nën kontroll të plotë transmetuesin publik.
