Të hënën pritet të rinisë protesta e studentëve që u ndërpre për shkak të pushimeve të fundvitit.
Një pjesë e studentëve nuk e kanë ndalur protestën as në ditët e pushimeve ndërsa të hënën pritet që ajo të jetë masive. Studentët kanë deklaruar se nuk i pranojnë ofertat e kryeministrit Rama pasi sipas tyre ato nuk i përmbushin kërkesat e plota të tyre.
Ata kanë theksuar se ligji për Arsimin e Lartë duhet të rrëzohet pasi ka krijuar problematikën në universitete si dhe shprehen se VKM-të e qeverisë nuk japin asnjë lloj garancie dhe sigurie.
Studentët thonë se nuk bëhet fjalë thjesht për tarifën e regjistrimit por edhe për atë të shkollimit.
Kryeministri Rama ka zhvilluar disa takime me një pjesë studentësh e pedagogësh javët e fundit në një tur që ai e ka quajtur si dialog për zgjidhjen e kërkesave të studentëve, por këta të fundit e kanë quajtur fals atë dhe kanë deklaruar se studentët në takime nuk i përfaqësojnë.
