Pasi heshtën për javë me rradhë deputetet e Partisë Socialiste sot janë ‘indinjuar’ pasi deklaratave të fundit të kreut të PD-së Lulzim Basha në lidhje me rastin ‘Xhisiela’.
Ato janë shprehur se Basha ngriti paturpësisht mbi vajzën një seri episodesh telenovele groteske me polic hero dhe kërcënim mafioz, me lum akuzash publike për drejtuesit e Partisë Socialiste.
Më tej ato kanë bërë thirrje grave deputete të Partisë Demokratike të distancohen nga kjo politikë primitive që po përdor Basha.
“Koleget e nderuara të shkojnë të marrin në polici kamerat qe provojnë se partia e tyre po gënjen përdite dhe publikisht. Ato duhet të ndikojnë mbi udhëheqjen e tyre të çoroditur që Prokuroria dhe Gjykata të lihen të qetë të punojnë për të bërë drejtësi deri në fund.”, shprehen deputetet socialiste.
Reagimi i deputeteve socialiste
Ne Grupi i Grave Deputete të Partisë Socialiste shprehim indinjatën tonë të thellë për fyerjen dhe talljen që Kryetari i Opozitës i bën opinionit publik për rastin e Xhisiela Malokut. Pasi ngriti paturpësisht mbi vajzën një seri episodesh telenovele groteske me polic hero dhe kërcënim mafioz, me lum akuzash publike për drejtuesit e Partisë Socialiste, me lotë krokodili nëpër banaqe televizive, protestash të stisura për mbrojtjen e vajzës duke e dhunuar publikisht, sot që inskenimi kriminal po zbërthehet nga Prokuroria në të gjithë përmasën e saj të shëmtuar, Lulzim Basha del dhe sulmon pikërisht vajzën si të përdorur nga pushteti për të pështyrë opozitën.