Një 19-vjeçar është arrestuar në Tiranë pasi akuzohet se ka plagosur me pistoletë shokun e tij 17-vjeçar.
Ngjarja ka ndodhur orët e para të mëngjesit të sotëm në rrugën “Berit Beker” ku 19-vjeçari dyshohet se ka qëlluar aksidentalisht shokun, teksa po i tregonte armën pa leje.
Policia ka ndaluar gjithashtu edhe dy të rinj të tjerë, shokët të të parëve.
Njoftimi
“Plagosi aksidentalisht me armë zjarri shokun e tij, vihet në pranga 19-vjeçari. Vihen në pranga edhe 2 shtetas të tjerë, shokë të tyre. Sekuestrohet arma e zjarrit që 19-vjeçari e posedonte pa leje.
Rreth orës 01:40, pas njoftimit se në rrugën “Berit Beker” ishte plagosur me armë zjarri një 17-vjeçar, shërbimet e Sektorit për Hetimin e Krimeve të Rënda kanë shkuar menjëherë në vendngjarje, me qëllim sqarimin e rrethanave dhe dokumentimin e plotë ligjor të rastit.
Nga veprimet e para hetimore rezulton se në banesën e shtetasit R. S., 19 vjeç, ky i fundit, duke i treguar armën e zjarrit pistoletë shokut të tij dhe duke menduar se nuk kishte fishek në fole, e ka shkrepur aksidentalisht dhe për pasojë është plagosur 17-vjeçari.
Në përfundim të veprimeve të para hetimore:
-u bë arrestimi në flagrancë i shtetasit R. S., 19 vjeç, për veprat penale “Plagosja e rëndë nga pakujdesia”, “Veprime që pengojnë zbulimin e së vërtetës” dhe “Mbajtja pa leje e armëve dhe municionit luftarak”;
-u arrestuan shtetasit A. V., 20 vjeç dhe H. H., 22 vjeç, për veprën penale “Veprime që pengojnë zbulimin e së vërtetës”.
17-vjeçari ndodhet në spital, nën kujdesin e mjekëve. Vijojnë hetimet për dokumentimin e plotë të rastit dhe sqarimin e të gjitha rrethanave të ngjarjes. Materialet procedurale i kaluan Prokurorisë, për veprime të mëtejshme.”
